Кобяконская сельская библиотека

Ыам ыйын 22 күнэ – Сайылык күнэ

 Ил Дархан Айсен Николаев 2018 сыл сэтинньи 6 күнүгэр Саха Өрөспүүбүлүкэтигэр ыам ыйын 22 күнүгэр Сайылык күнүн бэлиэтиир туһунан ыйааҕы таһаарбыта.

  Хороҕор муостааҕы, сыспай сиэллээҕи иитэн олорор өбүгэлэрбит уһун, тымныы кыһын кэнниттэн баччаларга, от – мас тыллыыта, сүөһүлэрин- астарын илдьэ кыстыктарыттан сайылыкка көһөн тахсар үгэстээхтэрэ.

  Ыам ыйын 22 күнүн кинилэр дьыл бүтэн, саҥа сыл саҕаланар кэминэн ааҕаллара. Нууччалар кэлэн, Христос итэҕэлин киллэриэхтэриттэн, саха Саҥа сыла Ньукуола Таҥара күнүн кытта алтыспыта. Бу күн ыал барыта сайылыктарыгар тахсаннар, алаадьы буһараллара, кус сииллэрэ, сири- дойдуну аһаталлара, оҕо- уруу этэҥҥэ сылдьарын, сүөһү – ас этэҥҥэ турарын, уйгуну – быйаҥы биэрэрин туһугар Үрдүкү Айыылартан көрдөһөллөрө.

Сайылык

Дорообо, күөх сайын,

Үүт-сүөгэй сайылык!

Халлааҥҥа күн күлэр,

Күөрэгэй көччүйэр!

Ырыаһыт чыычаахтар

Сайыны туойаллар,

Көрүлүү көтүөххэ,

Сөтүөлүү сүүрүөххэ!

Ыаммыт үүтү ыймахтыах,

Күөрчэхтэ ытыйыах.

Сайылык бэлэҕэ –

Үрүҥ ас элбэҕэ!